“სამეფო კლუბმა” ყურადღება “ლივერპულის” 19 წლის გარემარბზე გაამახვილა.

მადრიდის “რეალი” მომავალ ზაფხულში “ლივერპულის” ახალგაზრდა ვარსკვლავის, რაჰიმ სტერლინგის ყიდვას აპირებს. “თეთრების” მთავარი მწვრთნელის, კარლო ანჩელოტის მომავალი წლის ერთ-ერთი პრიორიტეტული მიზანი სწორედ 19 წლის ტალანტის შეძენაა.

თავის მხრივ, “ლივერპული” სტერლინგის შენარჩუნებას ეცდება და ძალიან მალე, მერსისაიდელები მას გაუმჯობესებულ კონტრაქტს შესთავაზებენ. ცნობისთვის, ამ ეტაპზე, რაჰიმი მერსისაიდულ კლუბში კვირაში 30 ათას ფუნტ სტერლინგს იღებს.

ამ სიტუაციით სარგებლობას აპირებს მადრიდის “რეალის” ხელმძღვანელობა, რომელიც ნიჭიერი ფეხბურთელის გადაბირებას გეგმავს და მას შედარებით ხელსაყრელ ფინანსურ პირობებს სთავაზობს.

ამ სეზონში სტერლინგი, საკუთარი ჩინებული თამაშის წყალობით, მერსისაიდელთა ერთ-ერთი მთავარი ლიდერია. ნახევარმცველმა პრემიერ ლიგაში ჩატარებულ ხუთ მატჩში თავი სამი გოლითა და ერთი საგოლე პასით გამოიჩინა.