“ოლდ ტრაფორდზე” “ბარსელონას” მცველის, ხერარდ პიკეს დაბრუნებაზე ალაპარაკდნენ.
“მანჩესტერ იუნაიტედს” დაცვის ხაზში სერიოზული პრობლემები აქვს – მომავალ ზამთარს ლუი ვან გაალი პიკეს “ნისლიან ალბიონზე” დაბრუნებას ეცდება. ესპანელის სახით, ჰოლანდიელს ისეთი ფეხბურთელის დამატება უნდა, როგორებიც თავის დროზე სერ ალექს ფერგიუსონისთვის რიო ფერდინანდი და ნემანია ვიდიჩი იყვნენ.
კატალონიელმა მშობლიური გუნდის შემადგენლობაში მეშვიდე სეზონი დაიწყო – პიკეს “ბარსელონას” დატოვების სურვილი არასოდეს გამოუთქვამს. გარდა ამისა, საეჭვოა, რომ 27 წლის მცველს კარიერის ინგლისურ ეტაპთან კარგი მოგონებები აკავშირებდეს, რადგან ხერარდი “იუნაიტედში” მუდმივად სათადარიგოთა სკამზე იჯდა.
პიკეს “ბარსასთან” მოქმედი კონტრაქტის ვადა 2019 წლის ივნისის თვეში ეწურება. ტრანსფერმარკეტი ესპანელს 30 მილიონ ევროდ აფასებს.
|